શુક્રવાર, 16 મે, 2014

કોઈ જીતા કોઈ હારા

          
વિજેતાઓને થોડા પ્રશ્નો :

·       તમે ચૂંટાઈ ગયા, હવે શું કરવા માંગો છો ?
હવે ક્યાં કંઈ કરવાનું બાકી રહે છે ?

·       પ્રજાને તો તમારી પાસેથી ઘણી અપેક્ષાઓ છે.
અમારી અપેક્ષાઓ પૂરી થઈ; હવે પ્રજાને કહો પાંચ વર્ષ ધીરજ ધરે.

·       પણ તમે તો પ્રચારમાં બહુ વચનો આપેલાં !
અમે ક્યાં ના પાડીએ છીએ ? જરા જીતને પચાવવા તો દો !

·       વિરોધપક્ષની કઈ ખામી એમને નડી ?
અમારો વિરોધ કરવાની.

·       તમે સ્વચ્છ સરકાર આપશો ?
એ વળી શું ?

·       તમારા પ્રધાનો શિસ્ત જાળવશે ?
એક જ વાક્યમાં બે વિરોધી શબ્દો ના મૂકો.

·       દેશની પ્રગતિમાં તમે કેટલો ફાળો આપશો ?
ફાળો અમારે નહીં; અમને આપવાનો હોય.

·       તમે ગામેગામ ફર્યા, હવે શું ?
હવે એ ગામના લોકો અમારી પાછળપાછળ ફરશે.

·       તમને હાર મળત તો પચાવી શકત ?
હાર શબ્દ અમને ગળા પૂરતો જ ખબર છે.

·       પ્રજાને કંઈ કહેવું છે તમારે ?
વિપક્ષને ઠેકાણે પાડવા બદલ ધન્યવાદ. હવે તમે તમારે ઠેકાણે ને અમે અમારે ઠેકાણે.

·       જીત બદલ અભિનંદન અને શુભેચ્છાઓ.
અભિનંદન બદલ આભાર અને શુભેચ્છાઓની જેમને જરુર છે, એમને આપો તો વધારે સારું. અમને તો સૌની શુભેચ્છાઓ ફળી જ છે.

પરાજિતોને થોડા પ્રશ્નો :

·       તમે હારી ગયા, હવે શું કરવા માંગો છો ?
હવે ક્યાં કંઈ કરવાનું બાકી રહે છે ?

·       પ્રજા પાસેથી તમને શી અપેક્ષાઓ છે ?
બધી અપેક્ષાઓ પહેલાં પણ અમે પ્રજા પાસે જ રાખેલી અને કાયમ રાખીશું; પણ પ્રજા આટલી ચાલાક નીકળશે એવું નહોતું ધાર્યું.

·       પ્રજાને તમે ઘણાં વચનો આપેલાં, તેનું શું ?
સત્તા પર હોઈએ તો કંઈ થઈ શકે અને એમ પણ અમે વચનો પૂરાં કરવામાં બહુ ઢીલાં પડીએ. પ્રજા ક્યાં સુધી રાહ જુએ ?

·       તમને કોણ નડ્યું ?
અમે જ અમને નડ્યાં ! ને બીજું કોણ નડ્યું તે જગજાહેર છે.

·       ધારો કે, તમે જીતી જાત તો સ્વચ્છ સરકાર આપત ?
એ વળી શું ?

·       તમે ગામેગામ ફર્યા ને સભાઓ ભરી, આખરે તમને શું મળ્યું ?
હજી ઘણાં ગામો બાકી રહી ગયાં ને સભાઓ મોળી પડી, તે જાણવા મળ્યું.

·       તમે હારને પચાવી શકશો ?
હાર પચાવવી તો મુશ્કેલ જ છે; છતાં અમે વારંવાર ભેગા મળી, આત્મનિરીક્ષણ કરી, હારનું કારણ જાણીને જ જંપીશું. બધા આંકડા મેળવતાં ને નિષ્કર્ષ પર આવતાં, હાર પચાવીને ફરી બેઠાં થતાં, પાંચ વર્ષ તો જોતજોતામાં નીકળી જશે ! આ કંઈ પહેલી ને છેલ્લી હાર થોડી જ છે ?

·       પ્રજાને કોઈ સંદેશ ?
તમે અમારી સાન ઠેકાણે લાવી છે. અંદરઅંદરના ઝઘડા મિટાવીને કોઈના પર પણ આધાર રાખ્યા વગર, અમે પાંચ વર્ષની અંદર જ, અમારો એક સબળ નેતા કે અભિનેતા તૈયાર કરીને જ રહીશું એની ખાતરી રાખજો.

·       પાંચ વર્ષનો ગાળો બહુ લાંબો ન કહેવાય ?
પણ હવે વિરોધ પણ શેનો કરીએ ? કંઈ બોલવા જેવું જ નથી રહ્યું !

·       તો પછી તમે પણ વિરોધપક્ષમાં જોડાઈ જાઓ. બધા ઝઘડા જ ખતમ !
પણ, અમે તો વિરોધ પક્ષમાં જ છીએ ને ?

(હા, ભૂલ્યા, તમે તો ‘વિરોધપક્ષ’માં રહીને પણ ‘વિરોધીપક્ષ’નું કામ કરી શકો છો. પછી અહીં રહો કે ત્યાં; શો ફેર પડે છે ? તમને કે દેશને !)

                       ‘જય હિંદ’


2 ટિપ્પણીઓ:

  1. A good dialogue with both d parties....This is d common image of politicians.we wish that d days would come when....

    જવાબ આપોકાઢી નાખો
  2. સરસ લેખ. પણ હવે પરંપરા તૂટશે. જીતેલો પક્ષ ઘણું કરી બતાવશે. :)

    જવાબ આપોકાઢી નાખો